Merciles Beaute

Geoffrey Chaucer

 
A Triple Roundel
I. Captivity
Your yën two wol sle me sodenly,
I may the beaute of hem not sustene,
So woundeth hit through-out my herte kene.
And but your word wol helen hastily
My hertes wounde, whyl that hit is grene,
     Your yën two wol sle me sodenly;
     may the beaute of hem not sustene.
Upon my trouthe I sey yow feithfully,
That ye ben of my lyf and deth the quene;
For with my deth the trouthe shal be sene.
     Your yën two wol sle me sodenly,
     I may the beaute of hem not sustene,
     So woundeth hit through-out my herte kene.
II. Rejection.
So hath your beaute fro your herte chaced
Pitee, that me ne availeth not to pleyne;
For Daunger halt your mercy in his cheyne.
Giltles my deth thus han ye me purchaced;
I sey yow soth, me nedeth not to feyne;
     So hath your beaute fro your herle chaced
     Pilee, that me ne availeth not to pleyne
Allas! that nature hath in yow compassed
So gret beaute, that no man may atteyne
To mercy, though he sterve for the peyne.
     So hath your beaute fro your herte chaced
     Pitee, that me ne availeth not to pleyne;
     For daunger halt your mercy in his cheyne.
III. Escape.
Sin I fro love escaped am so fat,
I never thenk to ben in his prison lene;
Sin I am fre, I counte him not a bene.
He may answere, and seye this or that;
I do no fors, I speke right as I mene.
     Sin I fro love escaped am so fat,
     I never thenk to ben in his prison lene.
Love hath my name y-strike out of his sclat,
And he is strike out of my bokes clene
For ever-mo; [ther] is non other mene.
     Sin I fro love escaped am so fat,
     I never thenk to ben in his prison lene;
     Sin I am fre, I counte him not a bene.
               Explicit.
 

Poems by This Author

Canterbury Tales, The Nun's Priest's Tale [Excerpt] by Geoffrey Chaucer
This Chanticleer stood high upon his toes
Canterbury Tales, Wife of Bath's Prologue [Excerpt] by Geoffrey Chaucer
But now, sire,Ślat me seŚwhat I shal seyn
Canterbury Tales, General Prologue by Geoffrey Chaucer
Whan that Aprille with his shoures soote
Canterbury Tales, The Knight's Tale, Book I [Excerpt] by Geoffrey Chaucer
In days of old there lived, of mighty fame
An ABC (The Prayer of Our Lady) by Geoffrey Chaucer
Almighty and al merciable queene
The Love Unfeigned by Geoffrey Chaucer
O Yonge fresshe folkes, he or she
To Rosemounde by Geoffrey Chaucer
Ma dame, ye ben of al beaute shryne